పొలిటికల్ వీసీ లు వద్దు – అకాడమిక్ వీసీ లు కావాలి

ఆకుట్ జనరల్ సెక్రటరీ డా మామిడాల ఇస్తారి

రాజకీయ ప్రలోభాలకు లొంగని మంచి అకాడమిక్ అనుభవం కలిగిన వారిని కాకతీయ యూనివర్సిటీ వీసీ గా నియమించాలని కేయూ సెర్చి కమిటీ సభ్యులైన జే.ఎన్.టీ.యు ప్రొఫెసర్ ఆవుల దామోదరం (కేయూ ఈసీ నామినీ), జమ్మూ సెంట్రల్ యూనివర్సిటీ వైస్ చాన్సలర్ ప్రో. సంజీవ్ జైన్ (యూజీసీ నామినీ) లకు అసోసియేషన్ ఆఫ్ కాకతీయ యునివర్సిటీ టీచర్స్ (ఆకుట్) జనరల్ సెక్రటరీ డా మామిడాల ఇస్తారి ఈ మెయిల్ ద్వారా కోరారు.

కేయూ సెర్చి కమిటీ కు లేఖ….

ఈ సందర్భంగా డా మామిడాల ఇస్తారి మాట్లాడుతూ, కేయూ లో గతంలో వర్సిటీ పాలన పూర్తిగా అక్రమాలు, అవినీతి తో జరిగిందని, వ్యక్తిగత కక్షలతో టీచర్లపై, నాన్ టీచింగ్ ఉద్యోగులపై, విద్యార్థులపై, మహిళా టీచర్లు, ఉద్యోగులపై నిరంకుశ వైఖరిని ప్రదర్శించారని అన్నారు. కేయూ లో చదువుకునే విద్యార్థులు గ్రామీణ, బడుగు బలహీన వర్గాలకు చెందిన వారని వారిని అర్థం చేసుకొని వారికి న్యాయం చేసే వారిని వీసీ లుగా ఎంపిక చేయాలని సెర్చి కమిటీని ఈమెయిల్ ద్వారా కోరినట్లు తెలిపారు. గతంలో వీసీ పాలన పూర్తిగా రాజకీయ పరంగా ముగిసిందని విద్యార్థులపై కేసులు పెట్టీ పోలీస్ స్టేషన్లో కొట్టించిన సంఘటనలు లాంటివి మళ్ళీ పునరావృతం కాకుండా యూనివర్సిటీని, విద్యార్థులను కాపాడాలని అన్నారు. ఇంట్లో మగ దిక్కు లేకుండా గతంలో తండ్రి కొడుకులను వరంగల్ నుండి ఖమ్మం కు బదిలీలు చేసి వ్యక్తి గత కక్షలు తీర్చుకున్నారని, తన అనుచరుడుకి సీనియర్ ప్రొఫెసర్ ప్రమోషన్ ఇవ్వకుండా తాను మాత్రం అక్రమంగా సీనియర్ ప్రొఫెసర్ ప్రమోషన్ తీసుకొని పైశాచిక ఆనందం పొందారని అటువంటి వైస్ ఛాన్సలర్లను మళ్ళీ ఎంపిక చేయకుండా జాగ్రత్త పడాలని లెటర్ లో పేర్కొన్నారు.

సమస్యలను అవగాహన చేసుకునే సమర్థ వీసీ కావాలి

హాస్టల్ దగ్గరి నుండి ప్రారంభం చేస్తే అడ్మినిస్ట్రేషన్ బిల్డింగ్ వరకు కేయూ లో అనేక సమస్యలు వున్నాయని, ఇప్పటి వరకు టీచర్ల సీనియారిటీ లిస్ట్ కూడా సరియిన రీతిలో తయారయి లేదని తరుచూ సీనియారిటీ కొరకు వాగ్వాదాలు చేసుకోవాల్సి వస్తుందని, ఇద్దరు టీచర్ల మధ్య బేధాభిప్రాయాలు వస్తున్నాయని అన్నారు. టీచర్ల పదోన్నతుల ప్రక్రియలో చాలా సమస్యలు వున్నాయని గతంలో కొందరు ప్రొఫెసర్లు రిటైర్ అయ్యేంత వరకు చూసి వారు రిటైర్ అయిన తర్వాత కేయూ అధికారులు ఇంటర్వ్యూలు జరిపి వారి ప్రమోషన్లు వారే పొందారని ఇలాంటి కక్ష పూరిత చర్యలకు పాల్పడకుండా పాలనను కొనసాగించే వారిని వీసీగా ఎంపిక చేయాలని కోరారు.

అకడమిక్ అనుభవమే ముఖ్యం…

రీసెర్చి పేపర్ కు న్యూన్ పేపర్ కు తేడా తెలువని వారిని వీసీ లుగా నియమిస్తే వర్సిటీలో అకాడమిక్ పూర్తిగా దెబ్బతింటుందని, నాణ్యతతో కూడిన పరిశోధనలు జరగవని, మంచి అకాడమిక్ పరిశోధన అనుభవం వున్న వారినే వీసీ లుగా నియమించాలని సెర్చి కమిటీ మెంబర్లకు పంపిన లెటర్ లో కోరారు. ఏ సామాజిక వర్గానికి చెందిన వీసీ అయినా అన్ని సామాజిక వర్గాలను కలుపుకొని ఎటువంటి బేధాలు లేకుండా అందరికీ న్యాయం చేసేట్టు, వర్సిటీ సమగ్రత ను కాపాడే వారిని వీసీ లుగా ఎన్నుకోవాలని, రాజకీయ ప్రలోభాలకు లొంగకుండా మంచి బయోడేటా, నాయకత్వ లక్షణాలు గల వారిని ఎంపిక చెయ్యాలని కోరారు.