వరంగల్ జోర్దార్ ప్రతినిధి:
బంగ్లాదేశ్ లో హిందువులపై జరుగుతున్న ఆకృత్యాలను వెంటనే నిలిపివేయాలని కోరుతూ బుధవారం ఉదయం 10.30 కు హనుమకొండ వేయి స్తంభాల గుడి నుండి అంబేద్కర్ సర్కిల్ వరకు నిరసన ర్యాలీని చేపట్టనున్నట్లు వరంగల్ మహా నగరానికి చెందిన హిందూ ధర్మ పరిరక్షణ సమితి ప్రతినిధులు ఏనుగొందుల రాజు, ప్రముఖ అడ్వకేట్ సముద్రాల కవిత, మిట్టపల్లి కపిల్ కుమార్ తెలిపారు.
హనుమకొండ బాలసముద్రంలోని సామా జగన్మోహన్ స్మారక భవనంలో మంగళవారం ఏర్పాటుచేసిన పాత్రికేయుల సమావేశంలో వారు మాట్లాడుతూ భారతదేశ సహకారంతో స్వాతంత్ర్యాన్ని పొందిన బంగ్లాదేశ్ ప్రజలు, ప్రభుత్వం అక్కడ మైనారిటీలు గా ఉన్న హిందువులపై గత కొంతకాలంగా అనేక ఆకృత్యాలకు పాల్పడుతూ, హిందూ దేవాలయాలను ధ్వంసం చేస్తూ, హిందూ మహిళలపై అత్యాచారాలు చేస్తూ హింసాత్మక సంఘటనలకు పాల్పడుతున్నారని అన్నారు. దీనిని నిరసిస్తూ బంగ్లాదేశ్ లో కొన్ని హిందూ సంస్థలు ఉద్యమించడంతో ఇస్కాన్ సన్యాసులు కృష్ణ ప్రభుదాస్, చిన్మయకృష్ణను బాధ్యుడిగా చేస్తూ వారిని అరెస్టు చేశారని తెలిపారు. అంతేకాకుండా అక్కడ ఉన్న కొన్నిహిందూ సంస్థలపై బంగ్లాదేశ్ ప్రభుత్వం నిషేధం విధించిందని వారు అన్నారు. బంగ్లాదేశ్ లో ఇటీవల ఏర్పడిన చాందసవాద ప్రభుత్వం హిందువులపై కఠిన వైఖరి అవలంబిస్తుందన్నారు. ప్రజాస్వామ్య మార్గంలో అక్కడి హిందువులు స్వీయ రక్షణ కోసం ఉద్యమిస్తుండగా ప్రభుత్వం వారిని నిర్దాక్షిణ్యంగా అని చివేస్తుందన్నారు. భారతదేశంలోని హిందువులు, హిందూ సంస్థలు బంగ్లాదేశ్ హిందూ బాధితులకు మద్దతుగా, అక్కడ జరుగుతున్న ఆకృత్యాలను వెంటనే నిలిపివేయాలని కోరుతూ, అరెస్టు అయిన ఇస్కాన్ సన్యాసులను విడుదల చేయాలని డిమాండ్ చేస్తూ బుధవారం నిరసన ర్యాలీని చేపట్టనున్నట్లు తెలిపారు. ఈ కార్యక్రమంలో హిందూ సంస్థలు, దేవాలయాల కమిటీలు, ప్రతి హిందువు పాల్గొనాలని వారు కోరారు.
Leave a Reply