|
హైదరాబాద్ జొర్దార్ ప్రతినిధి:
తెలంగాణ రాష్ట్ర ఉన్నత విద్యామండలి ఆధ్వర్యంలో 2025 కామన్ ఎంట్రన్స్ టెస్ట్‌ల నిర్వహణ కోసం సమగ్ర కార్యాచరణ ప్రణాళిక రూపొందించారు. వీటిలో భాగంగా, పి.జి. మరియు యు.జి. ప్రొఫెషనల్ కోర్సుల్లో ప్రవేశాలను సులభతరం చేయడం లక్ష్యంగా ఉన్నట్లు విద్యా మండలి చైర్మన్ వెల్లడించారు. సెట్ పరీక్షల నిర్వహణ పారదర్శకంగా, నిష్పాక్షికంగా, అభ్యర్థుల సౌలభ్యాన్ని దృష్టిలో ఉంచుకుని చేపడుతున్నట్లు వివరించారు.
గతంలో ఎడ్సెట్ పరీక్ష నిర్వహణ బాధ్యత మహాత్మా గాంధీ విశ్వవిద్యాలయానికి రెండు సార్లు అప్పగించారు. ఈ వర్సిటీలో విద్యాశాఖ లేకపోవడంతో, ఉస్మానియా విశ్వవిద్యాలయం నుంచి ఒక విద్యా విభాగం ప్రొఫెసర్‌ను మహాత్మా గాంధీ యూనివర్సిటీకి పంపించి కన్వీనర్‌గా నియమించారు. దీనివల్ల పరీక్ష నిర్వహణ సంబంధిత నిపుణుల ఆధ్వర్యంలో జరిగేలా చర్యలు తీసుకున్నారు.
కేయూలో ఇదేం తీరు…..
అయితే, కాకతీయ విశ్వవిద్యాలయం పరిస్థితి వివాదాస్పదంగా మారింది. కేయూకి ఎడ్సెట్ నిర్వహణ బాధ్యత అప్పగించినప్పటికీ, కన్వీనర్‌గా ఫిజిక్స్ ప్రొఫెసర్‌ను నియమించడంపై విద్యార్థి సంఘాలు తీవ్ర ఆగ్రహం వ్యక్తం చేస్తున్నాయి. విద్యారంగానికి సంబంధించిన పరీక్షకు, సంబంధం లేని విభాగం నుంచి ప్రొఫెసర్‌ను నియమించడం అనైతికమని, ఇటువంటి అనైతిక విధానం కేయూ లో తరుచూ జరగడం సిగ్గు చేటని భావిస్తున్నారు.
ఎడ్సెట్ కన్వీనర్ నియామక రద్దు కోసం డిమాండ్…
కేయూ కి ఒక రెగ్యులర్ విద్యా విభాగానికి చెందిన ప్రొఫెసర్‌ను ఇతర విశ్వవిద్యాలయాల నుంచి డిప్యూట్ చేసి, కన్వీనర్‌గా నియమించాలని విద్యార్థి సంఘాలు పట్టుబడుతున్నాయి. ఈ నియామకం విద్యావ్యవస్థపై నమ్మకం పెంపొందించేందుకు అవసరమని పేర్కొంటున్నారు. ఫిజిక్స్ ప్రొఫెసర్ కు నిర్వహణ బాధ్యతలు అప్పచెప్పడంపై విద్యార్థి సంఘాలు ఆగ్రహం వ్యక్తం చేస్తున్నాయి. ఈ కన్వీనర్ నియామకాన్ని రద్దు చేయాలనే డిమాండ్ వినబడుతుంది.
ఎడ్సెట్ కన్వీనర్ నియామకంలో కులపక్షపాతమా?
ఎడ్సెట్ కన్వీనర్ నియామకంపై కులపక్షపాతం ఆరోపణలు వెలువడ్డాయి. కేయూ రిజిస్ట్రార్, వైస్ చాన్సలర్, మరియు తాజాగా నియమితుడైన ఫిజిక్స్ ప్రొఫెసర్—ముగ్గురూ ఒకే సామాజిక వర్గానికి చెందినవారని విమర్శకులు ఆక్షేపిస్తున్నారు. కుల ఆధారంగా నియామకాలు జరుగుతున్నాయనే ఆరోపణలు విద్యార్థి సంఘాలు మరియు మేధావుల్లో ఆందోళన కలిగిస్తున్నాయి. ఇది వరకే ఫిజిక్స్ విభాగం ప్రొఫెసర్ వెంకట్ రామిరెడ్డి గత ప్రభుత్వ హయంలో పాత పెన్షన్ విధానాన్ని పొందడానికి పావులు కదిపి నిబంధనలకు విరుద్ధంగా జీవో తెచ్చుకున్నారని ఫిర్యాదులు కూడా వున్నాయి. ఈ పరిస్థితుల్లో మళ్ళీ ఈ అక్రమ నియామకం దేనికి దారితీస్తుందో అనే చర్చ జరుగుతుంది.
అధికార దాహం కొరకు కేయూ ప్రొఫెసర్లు – నమ్మకం కోల్పోతున్న విద్యార్థులు….
ఇటీవల కేయూలో జరిగిన ఐసెట్ కుంభకోణం వ్యవహారం ఇప్పటికే వివాదాస్పదమైంది. ఇప్పుడు ఎడ్సెట్ వ్యవహారంలో పాక్షికత, పక్షపాతం ఆరోపణలు కేయూ ప్రతిష్టను మరింత దెబ్బతీస్తున్నాయని విమర్శకులు అంటున్నారు. విద్యార్థి సంఘాలు తక్షణమే ఈ నియామకాన్ని రద్దు చేసి, నిష్పాక్షికమైన ప్రాసెస్‌ను అమలు చేయాలని డిమాండ్ చేస్తున్నాయి. అధికార దాహం కొరకు కేయూ ప్రొఫెసర్లు చేసే ప్రయత్నాలు విద్యా వ్యవస్థను సిగ్గు పడేలా చేస్తున్నాయని, విద్యార్థి సంఘాల డిమాండ్‌కు సత్వరమే స్పందించి, పారదర్శకతకు భంగం కలగకుండా చర్యలు తీసుకోవాలని మేధావులు, విద్యార్థి సంఘాలు ప్రభుత్వాన్ని కోరుతున్నాయి.
Leave a Reply