కేయూ ఫార్మసీ కాలేజీల తనిఖీల్లో మాయాజాలం

కేయూ ఫార్మసీ కాలేజీల తనిఖీల్లో మాయాజాలం…
తనిఖీ కమిటీలను మార్చి అనుమతులు….?
ఫార్మసీ కోర్సుల అనుమతుల్లో అవినీతి దందాకు తెరలేపుతున్నదేవరు..?
రెండేసి సార్లు తనిఖీల్లో ఆంతర్యం ఏమిటీ..?

(హైదరాబాద్ /వరంగల్ జోర్దార్ నిఘా బృందం): కాకతీయ యూనివర్సిటీలో ఫార్మసీ కాలేజీ కోర్సుల అనుమతుల విషయం మళ్ళీ వివాదాస్పదమైంది. ఇటీవల ఆగష్టు చివరి వారంలో కేయూ కింద నడుస్తున్న వరంగల్, జనగాం, ఖమ్మం మరియు ఇతర అన్ని ఫార్మసీ కాలేజీల్లో కేయూ కాలేజ్ డెవలప్మెంట్ కమిటీ విభాగం నుండి తనిఖీలు చేసారు. ఫార్మ్ డీ కోర్సుల అనుమతుల విషయంలో గతంలో ఫిర్యాదులో వుండడంతో ప్రస్తుతం ఫార్మ్ డీ కోర్సుల అనుమతులు ఇప్పటి వరకు ఏ యే కాలేజీలకు ఇస్తున్నారో బయట పెట్టలేదు. ఖమ్మం లోని 3 కాలేజీల్లో ఏం.ఫార్మ్ కోర్సు అనుమతి నిరాకరించినట్లు తెలిసింది. సరైన సంఖ్యలో ఫ్యాకల్టీ లేదని, అవసరమైన పరిశోధన పరికరాలు లేవని, ఫెక్ డాక్యుమెంట్ లు తయారు చూయించారని తనిఖీ బృందం నిర్ణయించి అనుమతి ఇవ్వలేదు. ఈ తనిఖీ బృందంలో ఫార్మసీ డీన్ ప్రో. సమ్మయ్య, చైర్మన్ బోర్డు ఆఫ్ స్టడీస్ ప్రో. కృష్ణ వేణి లతో పాటు కేయూ అకాడమిక్ డీన్ మరియు కేయూ సీ.డీ.సీ నుండి కొందరు సభ్యులు కలిసి ఒక తనిఖీ బృందంగా ఏర్పడి తనిఖీలు చేసిన మాట విదితమే.

*తనిఖీ బృందంను మార్చడంలో ఆంతర్యం ఏమిటి?*

తనిఖీలు పూర్తయి 20 రోజులు గడవక ముందే ఖమ్మం లో అనుమతి పొందని మూడు కాలేజీల యాజమాన్యం పైరవీలు ప్రారంభించి విషయం ఇన్చార్జి వీసీ వాకాటి కరుణ వరకు వెళ్లిందని సమాచారం. మళ్ళీ తనిఖీలు జరపాలని ఇన్చార్జి వీసీ రిజిస్ట్రార్ ను ఆదేశించినట్టు సమాచారం. ఈ మేరకు సీ.డీ.సీ విభాగానికి రిజిస్ట్రార్ మళ్ళీ తనిఖీలు చెయ్యాలని చెప్పినట్టు సమాచారం. దీనితో ఆ మూడు కాలేజీలకు అనుమతులు ఇవ్వాలని ముందే నిర్ణయం అయి గతంలో తనిఖీ బృందంలో వున్న ఫార్మసీ డీన్ ప్రో.సమ్మయ్య, చైర్మన్ ప్రో. కృష్ణ వేణి లను కాదని అదే ఫార్మసీ విభాగం నుండి డా. స్వరూప, డా. షాయెద, డా నాగరాజు లతో కలిసి అకాడమిక్ డీన్, మరియు సీడీసీ విభాగం నుండి కొందరు బృందం గా ఏర్పడి ఈరోజు (6 సెప్టెంబర్) తనిఖీలు చేశారని సమాచారం.

ఏడాది నుండి లేని ఫ్యాకల్టీ, పరిశోధన పరికరాలు ఇప్పటికిప్పుడు ఎలా సమకూరుస్తారు. ఈరోజు తనిఖీల్లో చూయించిన పరికరాలు మరియు ఫ్యాకల్టీ రేపు కాలేజీల్లో వుంటాయా అనే చర్చ జరుగుతుంది. ఇవే కాలేజీలకు గతంలో ఎలా ఏం.ఫార్మ్ కోర్సు నడపడానికి అనుమతులు ఇచ్చారు. అనుమతులు ఇవ్వడానికి లక్షల్లో డబ్బు చేతులు మారుతుందా అనే ప్రశ్నలు ఉదయిస్తున్నాయి. ఇప్పటికే కొన్ని కాలేజీలు 300 పడకల ఆసుపత్రితో అనుబంధం లేదు వీటికి కూడా ఫార్మ్ డీ కోర్సులు ఎలా అనుమతి ఇచ్చే విషయం కేయూ అధికారులు ఆలోచిస్తున్నారు. మిగితా కోర్సుల రేనివల్ విషయంలో అనుమతులు బయట పెట్టీ ఫార్మ్ డీ కోర్సుల అనుమతుల విషయంలో బయట పెట్టకపోవడానికి కారణం ఏమిటి. తనిఖీ బృందం నివేదిక అందజేసినప్పిటికీ ఇప్పటి వరకు కోర్సుల అనుమతులు బయట పెట్టకపోవడం పలు అనుమానాలకు తావిస్తుంది.

ఫార్మసీ కాలేజీల్లో కోర్సుల అనుమతుల విషయంలో జరుగుతున్న పైరవీలకు లొంగకుండా ఇన్చార్జి వీసీ వాకాటి కరుణ రిజిస్ట్రార్ కు ఆదేశాలు జారీ చేస్తుందా…మొదట వెళ్లిన తనిఖీ బృందం నివేదిక తారు మారు చేసి కొత్త కమిటీ నివేదిక రూపొందించి ఏం.ఫార్మ్ కోర్సులకు అనుమతులు ఇచ్చి విద్యార్థులకు నాణ్యమైన విద్యను దూరం చేస్తారా….కొత్త తనిఖీ బృందం పైరవీలకు లొంగుతుందా అనేది వేచి చూడాలి.