|
జోర్దార్ వరంగల్ ప్రతినిథి; 18 అక్టోబర్ :
కాకతీయ యూనివర్సిటీ సోషాలజీ విభాగంలో నాల్గవ సెమిస్టర్ విద్యార్థులకు సెమినార్ నిర్వహించకుండానే మార్కులు కేటాయించి పరీక్షల విభాగానికి పంపిన ఘటన యూనివర్సిటీలో తీవ్ర చర్చనీయాంశంగా మారింది. విద్యార్థుల అకడమిక్ కష్టాన్ని పక్కనపెట్టి, అసైన్మెంట్, ప్రజెంటేషన్, అటెండెన్స్ వంటి కీలక అంశాలను విస్మరించి, కేవలం ఇంటర్నల్ పరీక్షలకు హాజరైన విద్యార్థులకు 50 మార్కుల సెమినార్ మార్కులు కేటాయించబడ్డాయి.
మార్కుల కేటాయింపు ప్రక్రియలో గందరగోళం…
నాలుగు నెలల క్రితం నిర్వహించిన థియరీ పరీక్షల అనంతరం సెమినార్ నిర్వహణ జరగాల్సి ఉండగా, అది పూర్తిగా విస్మరించబడింది. విద్యార్థులు ఎంపిక చేసిన అంశాలపై అసైన్మెంట్ సమర్పించి, సెమినార్ ఇవ్వాల్సి ఉండగా, ఈ ప్రక్రియను సోషాలజీ విభాగం హెడ్ పూర్తిగా పక్కనపెట్టారు. ఫలితంగా, పరీక్షల విభాగానికి పంపిన మార్కుల ఆధారంగా విడుదలైన ఫలితాల్లో కొందరికి తక్కువ, మరికొందరికి అధిక మార్కులు రావడం విద్యార్థి సంఘాల దృష్టికి వచ్చింది.
ఈ అవకతవకలపై విద్యార్థి సంఘాలు ఆధారాలు సేకరించి, కేయూ వైస్ చాన్సలర్ ప్రో ప్రతాప్ రెడ్డికి శుక్రవారం ఫిర్యాదు చేసినట్లు తెలిసింది. శనివారం ఉదయం యూనివర్సిటీ కాలేజీ ప్రిన్సిపాల్ సోషాలజీ విభాగాన్ని సందర్శించి, సెమినార్ రికార్డులపై వివరణ కోరగా, విభాగం హెడ్ ప్రొఫెసర్ స్వర్ణలత ఇంటర్నల్ పేపర్లను మాత్రమే చూపించినట్లు సమాచారం. ఇంటర్నల్ జవాబు పత్రాలు మూల్యాంకనం చేయకుండానే మార్కులు కేటాయించబడ్డాయని ప్రిన్సిపాల్ గమనించి విభాగం హెడ్‌ను మందలించినట్లు సమాచారం.
సాయంత్రం 5 తర్వాత సరిదిద్దే ప్రయత్నాలు…
విషయం వార్తా పత్రికల్లో వెలుగులోకి వచ్చిన వెంటనే, అదే రోజు సాయంత్రం 5.30 తర్వాత విభాగంలో సెమినార్ మార్కుల షీట్లను, అటెండెన్స్ రికార్డులను సరిచేసే ప్రయత్నాలు ప్రారంభమయ్యాయి. 5.45కి విభాగాన్ని సందర్శించిన విద్యార్థి సంఘాల నాయకులు, రికార్డుల సవరణ జరుగుతున్నదాన్ని ప్రత్యక్షంగా గమనించారు. “తప్పు చేసి సరిదిద్దే ప్రయత్నం ఎందుకు?”, “విద్యార్థుల జీవితాలతో చెలగాటం ఎందుకు?”. ఎప్పుడో పరీక్షల విభాగానికి పంపిన మార్కుల షీట్లను ఈ సాయంత్రం 6 గంటల సమయంలో ఎందుకు తీసినట్టు, సెమినార్ నిర్వహించకుండానే మార్కులు ఎలా వేస్తారు? అంటూ వారు ప్రశ్నలు సంధించారు.
విద్యార్తి సంఘాల నాయకులు ఆ ప్రొఫెసర్లు సరిచేస్తున్న రికార్డులను పరిశీలించగా ఒక పేపర్లో సెమినార్ మార్కులు వేసి సంతకం పెట్టీ ఉన్నట్టు, మరొక పేపర్లో సంతకం లేనట్టు అంతే కాకుండా ఆ రెండింటిలో విద్యార్థులకు మార్కుల తేడాలు ఉన్నట్లు, ఒక పేపర్లో మార్కులు పెన్నుతో రాసి ఉండగా, మరొక పేపర్లో కంప్యూటర్ ద్వారా ప్రింట్ తీసి ఉన్నట్లు గమనించారు. వీటిని ప్రశ్నించిన విద్యార్తి సంఘాల నాయకులకు ప్రొఫెసర్ల నుండి సమాధానం రాలేదు.
ఈ ఘటనపై యూనివర్సిటీ అధికారులు తక్షణ విచారణ జరిపి, బాధ్యులపై చర్యలు తీసుకోవాలని విద్యార్థి సంఘాలు డిమాండ్ చేస్తున్నాయి. పారదర్శకతను పాటిస్తూ, విద్యార్థుల అకడమిక్ న్యాయాన్ని కాపాడేందుకు రికార్డుల పరిశీలన జరగాలని వారు కోరుతున్నారు, మెరిట్ విద్యార్థుల జీవితాలతో చెలగాటం ఆడుతున్న ప్రొఫెసర్లపై చర్యలు తీసుకోవాలని డిమాండ్ చేస్తున్నారు.
Leave a Reply