స్వదేశీ విధానంతోనే దేశం ముందడుగు..

👉 వందేళ్ల ఆర్.ఎస్.ఎస్….

👉 కుటుంబ వ్యవస్థే దేశానికి పునాది….

– డా. మామిడాల ఇస్తారి

వరంగల్ 16 వ డివిజన్ కీర్తి నగర్ లోని కోటిలింగాల బస్తీలో రాష్ట్రీయ స్వయంసేవక్ సంఘ్ ఆధ్వర్యంలో విజయదశమి ఉత్సవాన్ని ఘనంగా నిర్వహించారు. ఆర్.ఎస్.ఎస్ ఏర్పడి 100 సంవత్సరాలు పూర్తయిన సందర్భంగా జరుగుతున్న శతాబ్ది కార్యక్రమాల్లో భాగంగా ఈ ఉత్సవాన్ని నిర్వహించారు.

కార్యక్రమానికి అధ్యక్షత వహించిన కాశీబుగ్గ నగర్ సంఘ్ చాలక్, ప్రముఖ న్యాయవాది చామర్తి ప్రభాకర్ మాట్లాడుతూ, ఆర్.ఎస్.ఎస్ ఎల్లప్పుడూ దేశ సేవలో ముందుండి అనేక సేవా కార్యక్రమాలను నిర్వహిస్తోందని పేర్కొన్నారు. ఉత్సవానికి ముఖ్య అతిథిగా హాజరైన ప్రముఖ వ్యాపారి అల్లాడి రాజు మాట్లాడుతూ, ఆర్.ఎస్.ఎస్ సామాజిక రంగంలో విశిష్టమైన సేవలు అందిస్తోందని అన్నారు.

ప్రధాన వక్తగా కాకతీయ యూనివర్సిటీ ప్రొఫెసర్ డా. మామిడాల ఇస్తారి పాల్గొని, ఆర్.ఎస్.ఎస్ స్థాపకుడు హెడ్గేవార్ గారి జీవిత విశేషాలను వివరించారు. స్వాతంత్ర్యానికి ముందే ఆయన కాంగ్రెస్, హిందూ మహాసభలలో పాల్గొని దేశానికి సేవ చేశారని, అనేక సార్లు జైలుకెళ్లారని తెలిపారు. కేవలం స్వాతంత్ర్యం సంపాదించుకోవడమే కాకుండా, దానిని నిలబెట్టుకోవడానికి, మళ్లీ దేశం పరాయి పాలనలోకి వెళ్లకుండా నిరోధించడానికి స్వయంసేవకులను తీర్చిదిద్దే వేదికగానే సంఘ్‌ను హెడ్గేవార్ ప్రారంభించారని అన్నారు.

వందేళ్ళలో ఆర్.ఎస్.ఎస్ ….

అయోధ్య రామమందిర నిర్మాణంలో రాష్ట్రీయ స్వయంసేవక్ సంఘ్ స్వయంసేవకులు కీలక పాత్ర పోషించారు. సమాజాన్ని, సాధు సంతులను, అనేక హిందూ సంఘాలను చైతన్యవంతం చేసి ప్రతి హిందువు రామమందిర నిర్మాణంలో భాగస్వామి అయ్యేలా చేశారు. అలాగే తిరుమలలో అన్యమత ప్రచారం జరగకుండా తిరుపతి పరిరక్షణ సమితి ద్వారా కృషి చేసి హిందూ సంప్రదాయాలను కాపాడారు. దేశ సమగ్రతకు అడ్డుగోడగా నిలిచిన 370 ఆర్టికల్ రద్దు కావడంలో సంఘ్ సమాజాన్ని, దేశ ప్రజలను చైతన్యవంతం చేసి ప్రభుత్వంపై ఒత్తిడి తీసుకువచ్చింది. ఈ మూడు అంశాల్లోనూ సంఘ్ జాతీయ సమైక్యత, సాంస్కృతిక పరిరక్షణ, దేశ భక్తి కోసం పోరాడి చారిత్రక విజయాలు సాధించింది.

డా ఇస్తారి మాట్లాడుతూ, సమాజ పరివర్తనే దేశ పరమ వైభవానికి దారి చూపుతుందని, అది పర్యావరణ పరిరక్షణ, భారతీయ కుటుంబ వ్యవస్థ పరిరక్షణ, స్వదేశీ విధానం ఆచరణ, సామాజిక సమరసత, నాగరిక బాధ్యతతో జీవనం అనే ఐదుంటితో సాధ్యం అవుతుందని అన్నారు.

భారతీయ కుటుంబ వ్యవస్థను కాపాడాలి…

విదేశీ శక్తులు భారతీయ కుటుంబ వ్యవస్థను విచ్చిన్నం చేయడానికి, కులాల మధ్య విభేదాలు సృష్టించడానికి ప్రయత్నిస్తున్నాయని ఆయన హెచ్చరించారు. విదేశీ వస్తువుల వినియోగం వలన దేశ ఆర్థిక వ్యవస్థ దెబ్బతింటుందని, రూపాయి విలువ పడిపోతుందని చెప్పారు. అందువల్ల స్వదేశీ విధానం అనుసరించడం అత్యంత ముఖ్యమని స్పష్టం చేశారు. కులాల పేరుతో హిందువులను విడగొట్టే ప్రయత్నం ఈ దేశంలో జరుగుతుందని, సామాజిక సమరసత ఆచరించడం వలన అన్ని కులాలు ఐకమత్యంగా కలిసి ఉండవచ్చని అన్నారు. నిత్యజీవితంలో స్వదేశీ జీవన విధానాన్ని అనుసరించడం వల్ల దేశము స్వావలంబత పెరుగుతుందని తెలిపారు. నీటిని పొదుపుగా వాడడం, ప్లాస్టిక్ వాడకం తగ్గించడం, వ్యవసాయంలో పురుగు మందులకు బదులు సేంద్రీయ వ్యవసాయాన్ని ప్రోత్సహించడం వంటి వాటి ఆచరణ వలన పర్యావరణ కాలుష్యాన్ని తగ్గించవచ్చని అన్నారు.

పాల్గొన్న స్వయంసేవకులు

ఈకార్యక్రమంలో కోటిలింగాల బస్తీకి చెందిన ఆర్.ఎస్.ఎస్ బాధ్యులు నూతి శ్రీనాథ్‌, బ‌స్తీ ప్ర‌ముఖ్ రావుల‌ప‌ల్లి వేణు, స‌భావ‌త్‌ గ‌ణేష్‌, స‌భావ‌త్‌ నాగ‌రాజు, ఇతర స్వయంసేవకులు, మహిళలు, బస్తీ ప్రజలు పెద్ద ఎత్తున పాల్గొన్నారు.