సెలవు పెట్టు.. కొత్త పోస్ట్ పట్టు

సెలవు పెట్టి విదేశాలకు.. తిరిగి వచ్చి మరోసారి సిటీలో పోస్టు కోసం ప్రయత్నాలు!
బదిలీ ఆర్డర్లను తుంగలో తొక్కుతున్న ఇంటర్ బోర్డు ప్రిన్సిపాల్‌పై విద్యార్థి సంఘాల ఆగ్రహం….

హైదరాబాద్/వరంగల్/సిద్దిపేట జోర్దార్ ప్రతినిధి:

తెలంగాణ ఇంటర్ బోర్డు వ్యవస్థలో రెగ్యులర్ బదిలీ విధానాలను లెక్కచేయకుండా, సెలవుల పేరుతో విదేశాలకు వెళ్లి తిరిగి వచ్చి మరోసారి సిటీ పోస్టు కోసం తహతహలాడుతున్న ఓ మహిళా ప్రిన్సిపాల్ వ్యవహారం తీవ్ర దుమారం రేపుతోంది. సిద్దిపేట జిల్లాకు చెందిన హుస్నాబాద్ ప్రభుత్వ జూనియర్ కళాశాలలో ప్రిన్సిపాల్‌గా పదవిలో ఉన్న కే. శోబా అనే మహిళ పై విద్యార్థి సంఘాలు, ఉపాధ్యాయ సంఘాలు ముఖ్యమంత్రి రేవంత్ రెడ్డి, ఇంటర్ బోర్డు అధికారుల దృష్టికి తీసుకెళ్లాయి.

1999లో రికార్డు అసిస్టెంట్గా ఉద్యోగంలో చేరిన ఆమె, వరంగల్ జిల్లా వర్ధన్నపేట జూనియర్ కళాశాల నుంచి జూనియర్ లెక్చరర్‌గా పదోన్నతిని పొంది, గత 25 సంవత్సరాలుగా వరుసగా వరంగల్ పరిసర ప్రాంతాల్లోనే విధులు నిర్వర్తిస్తూ అధిక హెచ్ఆర్ఏ పొందుతూ ఉన్నారు. ఈ కాలంలో వచ్చిన అనేక బదిలీ ఆర్డర్లను ‘యూనియన్ నేత’ అనే హోదాలో రద్దు చేయించుకుంటూ స్థానిక పోస్టుల్లోనే కొనసాగుతున్నారు. ముఖ్యంగా 2013 నుంచి 2024 వరకూ రంగసాయిపేట జూనియర్ కళాశాలలో ప్రిన్సిపాల్‌గా పనిచేశారు.

2024 డిసెంబరులో హుస్నాబాద్ ప్రభుత్వ జూనియర్ కళాశాలకు ప్రిన్సిపాల్‌గా వచ్చాక, కొద్ది రోజులకే లాంగ్ లీవ్ పెట్టి అమెరికా వెళ్లిపోయిన కే. శోబా, ఇప్పుడు తిరిగి వచ్చి హుస్నాబాద్‌కి రాకుండా మరోసారి వరంగల్ జిల్లా గీసుకొండ కాలేజీకి బదిలీ అయ్యేందుకు కసరత్తులు చేస్తుండటం తీవ్ర విమర్శలకు దారి తీసింది.

విద్యార్థి సంఘాలు, అసోసియేషన్లు ఇదొక అధికార దుర్వినియోగం అంటూ మండిపడుతున్నాయి. నాన్ లోకల్ నుంచి వచ్చినవారు తప్పనిసరిగా లోకల్ ప్రాంతాల్లో పనిచేయాల్సి ఉండగా, ఇలాంటి మినహాయింపులు ఎంతవరకు న్యాయమని ప్రశ్నిస్తున్నాయి. ముఖ్యమంత్రి రేవంత్ రెడ్డి, విద్యాశాఖ ముఖ్య కార్యదర్శి యోగితా రానా, ఇంటర్ బోర్డు కమిషనర్ కృష్ణా ఆదిత్య తక్షణమే జోక్యం చేసుకుని, కే. శోబాను హుస్నాబాద్‌నే కొనసాగేలా చర్యలు తీసుకోవాలని వారు డిమాండ్ చేస్తున్నారు.