టి పి ఎల్ క్రికెట్ ఫైనల్ పోటీలను ప్రారంభించిన ఎమ్మెల్యే నాయిని రాజేందర్ రెడ్డి

ఉపాధ్యాయులకు అండగా ఉంటాం: ఎమ్మెల్యే నాయిని రాజేందర్ రెడ్డి

టీచర్స్ ప్రీమియర్ లీగ్ క్రికెట్ ఫైనల్ పోటీలను ప్రారంభించిన ఎమ్మెల్యే నాయిని

ఉపాధ్యాయ క్రికెట్ క్రీడాకారులలో ఉత్సాహాన్ని నింపిన గాలి హర్షవర్ధన్ రెడ్డి

హనుమకొండ జోర్దార్ ప్రతినిధి

తెలంగాణ టీచర్స్ క్రికెట్ అసోసియేషన్ ఆధ్వర్యంలో రాష్ట్రస్థాయి ప్రభుత్వ ఉపాధ్యాయుల క్రికెట్ ఫైనల్ పోటీలు ఆదివారం కాకతీయ యూనివర్సిటీ క్రీడా మైదానంలో టిటిసిఎ రాష్ట్ర అధ్యక్షుడు స్టాలిన్ బేగ్ నిర్వహించారు.
ఐపీఎల్ ఫార్మాట్ తరహాలో టీచర్స్ ప్రీమియర్ లీగ్ (టిపిఎల్) సీజన్ 2 సూపర్ 8 క్రికెట్ పోటీలను హనుమకొండ శాసనసభ్యులు నాయిని రాజేందర్ రెడ్డి టాస్ వేసి ప్రారంభించారు.

ఈ సందర్భంగా ఎమ్మెల్యే మాట్లాడుతూ.. ఉపాధ్యాయులు స్వచ్ఛందంగా రాష్ట్రస్థాయి క్రికెట్ పోటీ నిర్వహించుకోవడం హర్షనీయం అన్నారు. పలువురు ఉపాధ్యాయులు తాము ఎదుర్కొంటున్న సమస్యలను ఎమ్మెల్యే కు విన్నవించగా..గత ప్రభుత్వం ఉద్యోగుల సంక్షేమాన్ని గాలికి వదిలేసి అన్ని రంగాలలో విఫలం చెంది రాష్ట్రాన్ని అప్పులపాలు చేసిందని అన్నారు .రేవంత్ రెడ్డి నాయకత్వంలో ప్రభుత్వం అహర్నిశలు కృషి చేస్తూ ఒక్కొక్క సమస్యను పరిష్కరిస్తుందని ఎమ్మెల్యే నాయిని రాజేందర్ రెడ్డి అన్నారు. ఉపాధ్యాయులు ప్రస్తావించిన సమస్యలను సీఎం దృష్టికి తీసుకువెళ్లి పరిష్కారానికి కృషి చేస్తానని హామీ ఇచ్చారు.

రాష్ట్రంలోని వివిధ జిల్లాల నుండి ప్రభుత్వ ఉపాధ్యాయులు 23 జట్లుగా ఏర్పడి దసరా సెలవుల సందర్భంగా గత అక్టోబర్ మాసంలో కరీంనగర్, హనుమకొండ ,రంగారెడ్డి జిల్లాల్లో ఐపీఎల్ ఫార్మాట్లో ప్రాథమిక పోటీలు నిర్వహించారు. అత్యుత్తమ ప్రదర్శన కనబరిచిన 8 జట్లతో సూపర్ 8 పేరిట ఆదివారం సెమీఫైనల్, ఫైనల్ పోటీలు కేయూ మైదానంలో నిర్వహించారు.
ఓల్డ్ పెన్షన్ స్కీం సాధన కోసం కొద్ది సంవత్సరాల క్రితం సిరిసిల్లలో ఉద్యమ తరహాలో ప్రారంభమైన ఈ క్రికెట్ పోటీలు ఉపాధ్యాయులలో మానసిక ఉల్లాసం మరియు శారీరక దారుఢ్యం లక్ష్యంతో నేడు పోటీలు నిర్వహిస్తున్నామని కార్యక్రమ ముఖ్య నిర్వాహకుడు స్టాలిన్ బేగ్ తెలిపారు. ప్రభుత్వ ఉపాధ్యాయులు అనేక సంఘాలుగా చీలి పోయిన నేపథ్యంలో వారిని క్రీడా స్ఫూర్తితో ఏకతాటిపై నడిపే లక్ష్యంతో ఈ క్రీడల నిర్వహణ కొరకు నడుం కట్టామని, గెలుపు ఓటములను సమానంగా స్వీకరించాలని ఆయన ఉపాధ్యాయులను కోరారు.

గాలి హర్షవర్ధన్ రెడ్డి కి స్వాగతం పలికిన క్రికెట్ నిర్వాహకులు

కేయూ క్రీడా మైదానానికి చేరుకొని పోటీలను వీక్షించిన టిటిసిఎ సంస్థ గౌరవ సలహాదారు గాలి హర్షవర్ధన్ రెడ్డి మాట్లాడుతూ.. తాను టీపీసీసీ అధికార ప్రతినిధి అయినప్పటికీ ఉపాధ్యాయ సమస్యల పరిష్కారం కోసం ప్రభుత్వంతో నిష్కర్షగా పోరాడుతున్నానని పేర్కొన్నారు. గత ప్రభుత్వంలో తొత్తులుగా వ్యవహరించిన కొన్ని ఉపాధ్యాయ సంఘాలు నేడు ఊసరవెల్లిలా రంగులు మార్చుకొని కల్లబొల్లి కబుర్లతో ఉపాధ్యాయులను మభ్య పెట్ట ప్రయత్నిస్తున్నారని వారి ఆటలు సాగనివ్వబోమని హెచ్చరించారు. ఉపాధ్యాయుల న్యాయమైన సమస్యల పరిష్కారం కోసం తాను నిరంతరం శ్రమిస్తున్నానని, ఈ విషయాన్ని గమనించి ఉపాధ్యాయ లోకం తనకు అండగా నిలబడాలని కోరారు.
టిపిఎల్ కప్ ఫైనల్ మ్యాచ్ ములుగు మరియు భద్రాద్రి కొత్తగూడెం జట్ల మధ్య జరిగింది. ములుగు జట్టు భద్రాద్రిపై విజయాన్ని సాధించి కప్పును గెలుచుకుంది. అంతకు క్రితం అత్యంత ఉత్కంఠ భరితంగా సాగిన సెమీఫైనల్ మ్యాచ్ లో భద్రాద్రి జట్టుకు చెందిన బ్యాట్స్ మెన్ శోభన్ చివరి బంతికి సిక్స్ కొట్టి జగిత్యాల వారియర్స్ పై గెలిచి ఫైనల్లో ప్రవేశించారు.

విజేతలకు అందజేసిన ట్రోఫీ మరియు షీల్డ్ లు

ఈ పోటీలకు స్పాన్సర్ గా వ్యవహరించిన నోముల శ్రీనివాసరెడ్డి తమ దివంగత తండ్రి రిటైర్డ్ టీచర్ తిరుపతిరెడ్డి గారి జ్ఞాపకార్థం రూపొందించిన ట్రోఫీ మరియు షీల్డ్ లను విజేతలకు బహూకరించారు.

క్రీడా నిర్వహణలో తమకు సహకరించిన రుక్కుముద్దీన్, మురళీధర్ ,రామకృష్ణారెడ్డి మరియు బహుమతులు స్పాన్సర్ చేసిన నోముల శ్రీనివాసరెడ్డికి నిర్వాహకులు కృతజ్ఞతలు తెలియజేశారు.

ఈ కార్యక్రమంలో తెలంగాణ టీచర్స్ క్రికెట్ అసోసియేషన్ రాష్ట్ర భాద్యులు , జయ కృష్ణ రెడ్డి, ఇనారా పవార్, రాథోడ్, ఉపేందర్ తదితరులు పాల్గొన్నారు.