–వరంగల్ ఎంపి డాక్టర్ కడియం కావ్య
ఘనంగా నవచేతన పుస్తక ప్రదర్శన ప్రారంభం
హనుమకొండ జోర్దార్ ప్రతినిధి :
నిరంతరం పుస్తక పఠనంతోనే ప్రపంచ విజ్ఞానం సాధ్యమని వరంగల్ పార్లమెంటు సభ్యురాలు డాక్టర్ కడియం కావ్య అన్నారు. జాతీయ పుస్తక వారోత్సవాలు, బాలల దినోత్సవం సందర్భంగా హనుమకొండ అశోకా కాంప్లెక్స్ లో ఏర్పాటు చేసిన నవచేతన (విశాలాంధ్ర) పుస్తక ప్రదర్శనను ఎంపి డాక్టర్ కడియం కావ్య ముఖ్య అతిథిగా విచ్చేసి బుధవారం ప్రారంభించారు. ఈ సందర్భంగా ఆమె మాట్లాడుతూ పుస్తకాలు విజ్ఞాన నేస్తాలని, సాంకేతికత ఎంతగా పెరిగినా పుస్తకాలకు ఉన్న ప్రాధాన్యత తగ్గలేదని అన్నారు. తల్లిదండ్రులు తమ పిల్లలను,ఉపాధ్యాయులు తమ విద్యార్థులను పుస్తకాలు చదివేలా ప్రోత్సాహించాలని, పుస్తక పఠనం పెరగడం ద్వారా మెరుగైన, ఆరోగ్యవంతమైన సమాజ నిర్మాణం సాధ్యమవుతుందని చెప్పారు. ప్రముఖ ప్రచురణ సంస్థలకు చెందిన అనేక రకాల పుస్తకాలు, ప్రపంచంలో పేరుపొందిన గొప్ప రచయితల పుస్తకాలు ఈ పుస్తక ప్రదర్శనలో అందుబాటులో ఉంచారని, ప్రత్యేక తగ్గింపు ధరలతో వీటిని పాఠకులకు అందించడం అభినందనీయమని అన్నారు. పుస్తక ప్రియులు, విద్యార్థులు, విద్యాసంస్థలు, గ్రంథాలయాలు ఈ అవకాశాన్ని సద్వినియోగం చేసుకోవాలని ఎంపి కావ్య కోరారు. నవచేతన బుక్ హౌస్ మేనేజర్ ఎర్ర నాగరాజు మాట్లాడుతూ ఈ పుస్తక ప్రదర్శన సందర్భంగా 10 నుండి 30 శాతం వరకు అన్ని రకాల పుస్తకాలపై ప్రత్యేక తగ్గింపు అందిస్తున్నామని, ఈ ప్రదర్శన ఈ నెలాఖరు వరకూ కొనసాగుతుందని తెలిపారు. ఈ పుస్తక ప్రదర్శన ప్రారంభ కార్యక్రమంలో సిపిఐ రాష్ట్ర సహాయ కార్యదర్శి తక్కళ్లపల్లి శ్రీనివాసరావు, హనుమకొండ జిల్లా కార్యదర్శి కర్రె బిక్షపతి, అరసం రాష్ట్ర అధ్యక్షులు డాక్టర్ పల్లేరు వీరస్వామి, డాక్టర్ ఎండి. నజీర్, టీయూడబ్ల్యూజేే జిల్లా ప్రధాన కార్యదర్శి తోట సుధాకర్, రాష్ట్ర కార్యవర్గ సభ్యులు కంకనాల సంతోష్, బుక్ హౌస్ మేనేజర్ ఎర్ర నాగరాజు,వివిధ సంఘాల నాయకులు నేదునూరి రాజమౌళి, దొమ్మాటి ప్రవీణ్, దండు మోహన్, ఏ. మురళి, ఎండి.ఉస్మాన్ పాషా, తాండూరి గోపి, సంపతి ప్రభాకర్, ఎం.సాంబయ్య, విద్యాలయ హైస్కూల్ ప్రిన్సిపాల్ గోపి, బి. ఇంద్రారెడ్డి, నవచేతన సిబ్బంది రమేష్, సూర్య, రాజు తదితరులు పాల్గొన్నారు.
Leave a Reply