రజకుల ఐక్యత ఆత్మగౌరవం ఆర్థిక అభివృద్ధి లక్ష్యంగా మహా పాదయాత్ర

-రజక సంక్షేమ సంఘం రాష్ట్ర అధ్యక్షుడు ముప్పు బిక్షపతి రజక

(12 డిసెంబర్, 2024: హైదరాబాద్ జోర్దార్ నిఘా పడాల రమేష్).:

సామాజికంగా రాజకీయంగా ఆర్థికంగా అలగదొక్కబడుతున్న రజకుల్లో ఐక్యతను తీసుకువస్తూ ఆత్మగౌరవాన్ని సాధించుకొని ఆర్థికంగా రాజకీయంగా ఎదగాలని లక్ష్యంతోనే రజక సంక్షేమ సంఘం రాష్ట్ర కమిటీ ఆధ్వర్యంలో మహా పాదయాత్రను చేపట్టనున్నట్లు రజక సంక్షేమ సంఘం రాష్ట్ర అధ్యక్షుడు ముప్పు బిక్షపతి రజక తెలిపారు. ఆయన మాట్లాడుతూ బీసీ సామాజిక వర్గంలో సమాజంలో సేవ కులంగా పరిగణించబడుతున్న రజక జాతిని మేలుకొల్పడంతో పాటు వారిని రాజకీయంగా ఆర్థికంగా సామాజికంగా ఐక్యం చేస్తూ రజక ఆత్మ గౌరవాన్ని నిలబెట్టాలని లక్ష్యంతోనే తాను ముందుకు సాగుతున్నానని ఆయన తెలిపారు. రజక సంక్షేమ సంఘం ఆధ్వర్యంలో రాష్ట్రవ్యాప్తంగా అట్టడుగు వర్గంలో ఉన్న రజక జాతిని మేలుకొలుపు ఎందుకు తాను పాదయాత్ర నిర్వహిస్తున్నట్టు ఆయన తెలిపారు. ఈ మహా పాదయాత్రకు ముందుగా గ్రామ గ్రామాన మండలాల వారిగా జిల్లాల వారీగా రజక సంఘం కమిటీలను నిర్మాణం చేసుకొని వాటి ద్వారా పాదయాత్ర విజయవంతానికి ముందుకు సాగనునట్లు ఆయన తెలిపారు. గ్రామీణ ప్రాంతంలో వివక్షకు గురవుతూ అనునిత్యం నిర్బంధాలకు వెట్టిచాకిరికి లోనవుతున్న రజక జాతి బిడ్డలలో ఐక్యతను నింపే ప్రయాణం త్వరలో ప్రారంభం కాబోతుందని దీనికి రజక జాతి మొత్తం మద్దతు ఇవ్వాలని ఆయన కోరారు. రాజకీయపరంగా స్థానిక సంస్థలతోపాటు చట్టసభల్లో దామాషా ప్రకారం మనకు రావాల్సిన వాటాను రాబట్టుకోవడంతోపాటు విద్యా, ఉద్యోగ అవకాశాలను మన పిల్లలకు కల్పించేందుకు రజక జాతిని ఐక్యం చేయనున్నట్లు తెలిపారు. ప్రభుత్వ రంగ సంస్థలలో అవసరమైన చోట ఉద్యోగ నియామకాలలో రజకులకు ప్రాధాన్యత కల్పించాలని ఆయన డిమాండ్ చేశారు. వెనుకబాటుకు గురైన రజక జాతి పిల్లలకు గురుకుల పాఠశాలలో కూడా వాటాలు కేటాయించాలని ఆయన కోరారు. అదేవిధంగా ప్రభుత్వ కార్యాలయాలు, ఆసుపత్రులు, దేవాలయాలలో అవసరమైన చోట రజక ఉద్యోగాలను కేటాయించి అర్హులైన రజకులను నియమించాలని ఆయన ప్రభుత్వాన్ని కోరారు. గీత చేనేత కార్మికుల మాదిరిగా సమాజంలో ఎంతో విలువైన సేవా వృత్తిని చేపడుతూ సమాజానికి అన్ని రకాలుగా ఉపయోగపడే రజకులకు కూడా 55 సంవత్సరాలు నిండిన వారికి వృద్ధాప్య పెన్షన్ అందజేయడంతో పాటు ప్రతి గ్రామంలో దోబీగాట్ల నిర్మాణం చేపట్టాలని ఆయన అన్నారు. రజక యువతను ప్రోత్సహించే విధంగా ఉపాధి కల్పించే లక్ష్యంతో డ్రై క్లీనింగ్ సెంటర్ లకు ప్రభుత్వం ఎలాంటి షరతులు లేకుండా 10 లక్షల వరకు రుణ సౌకర్యాన్ని కల్పించి 50% సబ్సిడీ కల్పించాలని ఆయన కోరారు. రజకులను వృత్తి కార్మికులు గా కాకుండా సేవా కార్మికులుగా గుర్తించి బీమా సౌకర్యాన్ని కల్పించాలని ఆయన డిమాండ్ చేశారు. రాబోవు రోజుల్లో తెలంగాణ వ్యాప్తంగా పర్యటించి రజకులను ఐక్యతను తీసుకురావడంతోపాటు సామాజికంగా ముందంజలో నిలపడానికి కృషి చేస్తారని తెలిపారు.