కేజీబీవి విద్యార్థులకు వసతులు కల్పించడంలో నిర్లక్ష్యం వహిస్తే కఠిన చర్యలు తీసుకుంటాం

-జిల్లా కలెక్టర్ అభిలాష అభినవ్

(నిర్మల్ జోర్దార్ ‍ప్రతినిధి, 23 నవంబర్): కేజీబీవీ విద్యార్థులకు వసతులు కల్పించడంలో నిర్లక్ష్యం వహిస్తే కఠిన చర్యలు తీసుకుంటామని జిల్లా కలెక్టర్ అభిలాష అభినవ్ అధికారులను ఆదేశించారు.శనివారం మామడ మండల కేజీబీవి పాఠశాలను స్థానిక సంస్థల అదనపు కలెక్టర్ ఫైజాన్ అహ్మద్ తో కలిసి ఆమె సందర్శించారు.ముందుగా తరగతి గదులు,వంట గది, మరుగుదొడ్లు,స్నానపు గదులను పరిశీలించి అధికారులకు పలు సూచనలు చేసారు. ఈ సందర్బంగా కలెక్టర్ మాట్లాడుతూ,ప్రభుత్వ వసతి గృహల్లో విద్యార్థులకు మెరుగైన వసతులు కల్పించాలని ఆదేశించారు.విద్యార్థులకు కనీస వసతులు కల్పించడంలో నిర్లక్ష్యం వహిస్తున్న కేజీబీవి ప్రత్యేక అధికారి,మండల ఎంపిడిఓ లకు కలెక్టర్ షోకాజ్ నోటీసులు జారీ చేశారు. ప్రభుత్వ పాఠశాలలో చదువుతున్న విద్యార్థులకు నాణ్యమైన విద్యతోపాటు మెరుగైన వసతులు కల్పించాలని అన్నారు. ప్రతిరోజు విద్యార్థులకు మెనూ ప్రకారం భోజనాన్ని అందించాలన్నారు. వంటకు నాణ్యమైన సరుకులను, కూరగాయలను మాత్రమే వాడాలన్నారు. విద్యార్థులందరికీ స్వచ్ఛమైన త్రాగునీరు మాత్రమే అందించాలని తెలిపారు.వసతి గృహాలలో త్రాగునీరు,వంటగది, స్నానపు గదులు, మరుగుదొడ్లు నిరంతరం పరిశుభ్రంగా ఉంచాలని సూచించారు.పాఠశాల ప్రాంగణంలో పిచ్చి మొక్కలను తొలగించాలని, నిర్లక్ష్యం వహిస్తే సంబంధిత అధికారులు సిబ్బందిపై కఠిన చర్యలు తీసుకోవడం జరుగుతుందని హెచ్చరించారు.కలెక్టర్ వెంట జిల్లా విద్యాశాఖ అధికారి పి.రామారావు, ఎంపీడీవో సుశీల్ రెడ్డి, కేజీబీవి కోఆర్డినేటర్ సలోని,ప్రత్యేకాధికారి జ్యోతి,అధికారులు, సిబ్బంది,తదితరులు పాల్గొన్నారు.