అక్రమార్కులకు మున్సిపల్ అధికారుల అండ

సూర్యాపేటలో సామాన్యులు బతికే పరిస్థితి లేదు

30 ఏళ్లుగా నివాసం ఉంటున్న మా ఇంటి నెంబర్ రద్దుచేసి నల్లా కనెక్షన్ కట్ చేస్తామంటున్నారు

మా కుటుంబం మొత్తం ఆత్మహత్య చేసుకోవడం తప్ప మాకు వేరే దారి లేదు

* అక్రమార్కులకు కొమ్ముకాస్తూ అవినీతికి సహకరిస్తున్న మున్సిపల్ అధికారులు
సూర్యాపేట డిసెంబర్ 07 జోర్ధార్ ప్రతినిధి:
30 ఏళ్లుగా నివాసం ఉంటున్న మా సొంత స్థలంలో ఇల్లు కట్టుకొని తీసుకున్న ఇంటి నెంబర్ ను రద్దు చేయడంతో పాటు ఇప్పుడు నల్ల కనెక్షన్ తొలగిస్తామని మున్సిపల్ అధికారులు వచ్చారని వారు పెట్టే ఇబ్బందులతో మా కుటుంబం మొత్తం ఆత్మహత్యలు చేసుకునే పరిస్థితి వచ్చిందని సూర్యాపేట జిల్లా కేంద్రంలోని తాళ్లగడ్డకు చెందిన రాచకొండ సాయిబాబా రమణ దంపతులు ఆవేదన వ్యక్తం చేశారు. శుక్రవారం వారి నివాసం వద్ద విలేకరులకు తమ గోడు వెల్లబోసుకున్నారు. తాము 1998లో తాళ్లగడ్డలోని సర్వేనెంబర్ 780లో మూడు గుంటల జాగను గోపగాని వెంకటేశం నుంచి కొనుగోలు చేశామని అందుకు సంబంధించిన అన్ని రకాల డాక్యుమెంట్లు తమ వద్ద ఉన్నాయన్నారు. కాగా 2012లో దొంగ పహానితో కట్టెకోల నరసింహారావు నుంచి కొనుగోలు చేసినట్లు పాలడుగు పరశురాములు అనే వ్యక్తి తాము గదులు నిర్మిస్తుండగా తమ వద్దకు వచ్చి గొడవ చేయడంతో తాము కోర్టుకు వెళ్ళామన్నారు. కేసు కోర్టులో నడుస్తుండగా 2024లో మా డాక్యుమెంట్లు అన్ని మున్సిపల్ అధికారులకు సమర్పించి ఇంటి నెంబర్ 1-1-43/3/3 తీసుకున్నామన్నారు. మా స్థలం పంచాయతీ కోర్టులో ఉండగా తాము కోర్టు సూచనల మేరకు మున్సిపల్ అధికారులకు నా వద్ద ఉన్న అన్ని రకాల లింక్ డాక్యుమెంట్లను చూపించాను కానీ పాలడుగు పరుశురాములు అనే వ్యక్తి తన వద్ద ఉన్న డాక్యుమెంట్లను నేటి వరకు చూపించలేదన్నారు. గత 30 సంవత్సరాలుగా మేము అసలైన భూమి యజమాని వద్దనే భూమి కొనుగోలు చేసి ఉంటున్నామని తెలిపారు. ఈ చుట్టుపక్కల ఉన్న వారంతా వెంకటేశం దగ్గర కొనుగోలు చేసిన వారేనని ఒక్క పాలడుగు పరశురాములు మాత్రం కట్టెకోల నరసింహారావు వద్ద ఎలా కొనుగోలు చేశారని ఆయన ఎలా అమ్మాడని ప్రశ్నించారు. కట్టేకోల నరసింహారావు ది కాని భూమి పాలడుగు పరశురాములు కు అమ్మినట్లు దొంగ పత్రాలు సృష్టించి మమ్మల్ని ఇబ్బందులు పెడుతున్నారని అన్నారు. పాలడుగు పరశురాములు కు మున్సిపల్ అధికారులు అండగా ఉంటూ మా ఇంటి నెంబర్ ను రద్దు చేయడంతో పాటు ప్రస్తుతం నల్ల కనెక్షన్ తొలగించేందుకు వచ్చారని మేము ఇంట్లో ఎలా ఉండాలని అన్నారు. ఉన్నతాధికారులు స్పందించి నా పత్రాలు పాలడుగు పరుశురాములు పత్రాలు చూసి ఎవరివి దొంగ పత్రాలో గుర్తించి నాకు తగిన న్యాయం చేయాలన్నారు. 30 సంవత్సరాలు గా నివాసముంటున్న స్థలాన్ని కబ్జా చేయాలనుకుంటున్నారని అందుకు అధికారులు సహకరిస్తున్నారని నిరుపేద వాడినైనా నేను నా వద్ద న్యాయంగా అన్ని పత్రాలు ఉన్నప్పటికీ కోర్టుల చుట్టూ తిరిగి ఆర్థికంగా ఎంతో నష్టపోయానని కుటుంబంతో సహా ఆత్మహత్య తప్ప నాకు వేరే శరణ్యం లేదన్నారు. ఇప్పటికైనా ఉన్నతాధికారులు జిల్లా కలెక్టర్ స్పందించి ఆ డాక్యుమెంట్లను పరిశీలించి చుట్టుపక్కల స్థానికులను అడిగి తెలుసుకుని నాకు న్యాయం చేయాలని విజ్ఞప్తి చేశారు.