హైకోర్టులో లభించని ఊరట…..

పిటిషనర్ వాదనలు విన్న ధర్మాసనం..

హనుమకొండ జోర్దార్ ప్రతినిధి: కాకతీయ యూనివర్సిటీ సర్వే నెంబర్ 229 లో భూకబ్జా దారులు 235 సర్వే నెంబర్ గా మార్చుకొని గత కొన్నేళ్లుగా ఇండ్లు కట్టుకొని నివాసం వుంటున్న నేపథ్యంలో యూనివర్సిటీ అధ్యాపక సంఘం అకుట్ మరియు విద్యార్థి సంఘాలు ప్రభుత్వానికి, కేయూ అధికారులకు, విజిలెన్స్ అధికారులకు ఫిర్యాదు చేయగా ఇటీవల విజిలెన్స్ అధికారులు ల్యాండ్ మరియు రెవెన్యూ అధికారులతో సర్వే చేయించగా కేయూ భూములు భూకబ్జా జరిగిందని దీనిలో కేయూ ఏ.అర్ అశోక్ బాబు నివాసముంటున్న ఇల్లుతో సహా మరి కొందరు కూడా ఉన్నారని విచారణ అధికారులు తెల్చడంతో 9 మంది హైకోర్టును ఆశ్రయించారు. ఈరోజు హైకోర్టులో వాదనలు విన్న ధర్మాసనం స్టే ఇవ్వడానికి నిరాకరించింది.

వివరాల్లోకి వెళితే, సెక్షన్ 254 కింద డిప్యూటీ కమీషనర్, కాజీపేట సర్కిల్, వరంగల్ మున్సిపల్ కార్పొరేషన్ వారు మరియు గ్రేటర్ వరంగల్ మున్సిపల్ వారు సెప్టెంబర్ 2 న కేయూ పరిదిలో వున్న భూముల ఆక్రమణకు సంబంధించి బీసీ కాలనీ గుండ్ల సింగారం కుమారపల్లి లో వుంటున్న కొందరికి నోటీసులు జారీ చేశారు. వీరిలో 9 మంది హైకోర్టును ఆశ్రయించగా హైకోర్టులో ఈరోజు వీరి అభ్యర్థనపై వారి న్యాయవాది చిక్కుడు ప్రభాకర్ వాదనలను వినిపించారు. వరంగల్ మున్సిపల్ వారు ఇచ్చిన నోటీసులకు ఇదే నెల 5 న ఆరోపణలు ఎదుర్కొంటున్న వారు ఇచ్చిన సమాధానాన్ని పరిగణనలోకి తీసుకోవాలని, సమాధానాన్ని పరిగణనలోకి తీసుకోకుండా ఎటువంటి చర్యలు మున్సిపల్ వారు చేపట్టుకూడదని ఉత్తర్వులు వెలువరించాలని కోరారు.

వాదనలు విన్న ధర్మాసనం, ఈరోజు రాత్రి ఉత్తర్వులను విడుదల చేసింది. తేదీ 26.03.2022 న వరంగల్ మున్సిపల్, కాజీపేట సర్కిల్ మున్సిపల్ కార్యాలయం నుండి ఆరోపణలు ఎదుర్కొంటున్న పెండ్లి అశోక్ బాబు ఇంటితో సహా 13 మందికి నోటీసులు జారీ చేయగా తేదీ 30.03.2022 న ఆ నోటీసులకు సమాధానం సమర్పించారని, ఆ తర్వాత మున్సిపల్ అధికారులు ఆ సమాధానానికి ఎటువంటి చర్యలు చేపట్టకుండా మళ్ళీ తేదీ 2.09.2024 నాడు మళ్ళీ నోటీసులు జారీ చేశారని, రెండవ సారి నోటీసులు అందుకున్న భూ ఆక్రమణ ఆరోపణలు ఎదుర్కొంటున్న వారు మళ్ళీ తేదీ 5.09.2024 న రెండవ సారి కూడా వాటికి సమాధానం ఇస్తూ అన్ని డాక్యుమెంట్ లు సమర్పించారని ఆ తర్వాత విజిలెన్స్ అధికారులు, రెవిన్యూ మరియు ల్యాండ్ సర్వే వాళ్ళతో తేదీ 9.9.2024 మరియు 10.9.2024 రోజుల్లో సర్వే చేయించి ఆక్రమణకు గురయిన భాగాన్ని కూల్చి వేసేందుకు మార్కింగ్ చేశారని ఉత్తర్వుల్లో పేర్కొన్నారు. అయితే మున్సిపల్ అధికారులు తదుపరి చర్యలు తీసుకునేముందు భూ ఆక్రమణ ఆరోపణలు ఎదుర్కొంటున్న వారు ఇచ్చిన డాక్యుమెంట్ లను క్షుణ్ణంగా పరిశీలించి సంబంధిత అధికారులు చట్టానికి అనుగుణంగా ఉత్తర్వులను వెంటనే జారీచేయాలని హైకోర్టు అభిప్రాయ పడింది.

ఇక మున్సిపల్ అధికారుల చర్యలే మిగిలి ఉన్నాయి….

ల్యాండ్ సర్వే అధికారులు, రెవెన్యూ అధికారులు కలిసి చేసిన సర్వే రిపోర్టును వెంటనే బయట పెట్టాలని రిపోర్టు ఆధారంగా చర్యలు తీసుకోవాలని హైకోర్టు కూడా మున్సిపల్ అధికారులకు ఆదేశించిన దరిమిలా వెంటనే మున్సిపల్ అధికారులు ఆక్రమణకు గురయిన ఇండ్లను కూల్చివేసి కాకతీయ యూనివర్సిటీకి అప్పగించాలని విద్యార్థి ఉద్యోగ సంఘాల నుండి డిమాండ్ వెలువడుతుంది. కోర్టు ఉత్తర్వుల ప్రకారం సంబంధిత అధికారులు రంగంలోకి దిగి చర్యలు తీసుకోవాలని అంతే కాకుండా గత కొన్నేళ్లుగా ఏ ఆర్ అశోక్ బాబు ఆక్రమణ భూమిని అనుభవించినందుకు గాను వెంటనే సస్పెండ్ చేసి ఆయనపై క్రిమినల్ చర్యలు తీసుకోవాలని సర్వత్రా డిమాండ్ వినిపిస్తుంది.