ప్రభుత్వ విద్యాలయాల్లో నాణ్యమైన విద్యను అందించాలి:
- రాష్ట్ర విద్యా కమిషన్ చైర్మన్ ఆకునూరి మురళీ
(నిర్మల్ జోర్దార్ ప్రతినిధి)
ప్రభుత్వ విద్యాలయాల్లో నాణ్యమైన విద్యను అందించాలని రాష్ట్ర విద్యా కమిషన్ చైర్మన్ ఆకునూరి మురళి తెలిపారు.గురువారం సాయంత్రం కలెక్టరేట్ లోని సమావేశం మందిరంలో జిల్లా కలెక్టర్ అభిలాష అభినవ్ తో కలిసి ఆయన ప్రభుత్వ పాఠశాలలలో విద్యా ప్రమాణాల పెరుగుదలకు చేపట్టవలసిన చర్యలపై అధికారులు, ఉపాధ్యాయులతో సమావేశం నిర్వహించారు. ఈ సందర్భంగా విద్యా కమిషన్ చైర్మన్ మాట్లాడుతూ విద్యార్థుల విద్యా ప్రమాణాలు మెరుగుపరిచే బాధ్యత ప్రతి ఉపాధ్యాయునిపై ఉందన్నారు.విద్యార్థులు మంచి విద్యను అభ్యసించేందుకు వీలుగా పాఠశాలల్లో ఆరోగ్యకరమైన వాతావరణాన్ని సృష్టించాలన్నారు. ఉపాధ్యాయులు ప్రత్యేక కార్యచరణలు రూపొందించి చదువులో వెనుకబడిన విద్యార్థులను ప్రోత్సహించాలన్నారు. మెరుగైన విద్యతోపాటు, నాణ్యమైన భోజనాన్ని అందించాలని తెలిపారు. విద్యార్థులలో విద్యా ప్రమాణాలు మెరుగుపరిచేందుకు తీసుకోవలసిన చర్యలపై ఉపాధ్యాయుల నుంచి సూచనలు, సలహాలు స్వీకరించారు.అనంతరం జిల్లా కలెక్టర్ అభిలాష అభినవ్ మాట్లాడుతూ, జిల్లాలో ప్రభుత్వ పాఠశాలల్లో విద్యార్థులకు నాణ్యమైన విద్యను అందించేందుకు అన్ని రకాల చర్యలు తీసుకుంటున్నామని తెలిపారు.కేజీబీవీలు, సంక్షేమ వసతి గృహాలు, ఇతర ప్రభుత్వ పాఠశాలలను మండల ప్రత్యేక అధికారులు ప్రతి మంగళ,శుక్రవారాల్లో తనిఖీ చేస్తూ విద్య, భోజనం, కల్పిస్తున్న వసతులను నిరంతరం పర్యవేక్షిస్తున్నట్లు తెలిపారు.విద్యార్థులందరికీ నాణ్యమైన భోజనాన్ని అందిస్తున్నామని తెలిపారు.ఈ సమావేశంలో అదనపు కలెక్టర్లు ఫైజాన్ అహ్మద్, కిషోర్ కుమార్ లు, జిల్లా విద్యాధికారి పి. రామారావు, జిల్లా సంక్షేమ శాఖల అధికారులు అంబాజీ, రాజేశ్వర్ గౌడ్, మోహన్ సింగ్, ఉపాధ్యాయులు, ఇతర అధికారులు,సిబ్బంది తదితరులు పాల్గొన్నారు.
Leave a Reply