ఉపాధ్యాయుల కోసం అహర్నిశలు శ్రమిస్తా: టిపిసిసి అధికార ప్రతినిధి గాలి రెడ్డి హర్షవర్ధన్ రెడ్డి
హనుమకొండ జోర్దార్ ప్రతినిధి
కాకతీయ యూనివర్సిటీ క్రీడా మైదానంలో తెలంగాణ టీచర్స్ క్రికెట్ అసోసియేషన్ ఆధ్వర్యంలో ప్రభుత్వ ఉపాధ్యాయులకు నిర్వహించిన క్రికెట్ మ్యాచ్ ఫైనల్ పోటీలను ఎమ్మెల్సీ అభ్యర్థి, టీపీసీసీ అధికార ప్రతినిధి గాలి రెడ్డి హర్షవర్ధన్ రెడ్డి తిలకించారు. ఈ సందర్భంగా క్రీడా వేదిక వద్ద టి పిఆర్టీటియు రూపొందించిన వార్షిక క్యాలెండర్ను వరంగల్ జిల్లా శాఖ అధ్యక్షురాలు సంగీత మరియు ప్రధాన కార్యదర్శి శ్రీనివాస్ రెడ్డిల సమక్షంలో ఆవిష్కరించారు.
అనంతరం ఉపాధ్యాయులను ఉద్దేశించి ఆయన మాట్లాడుతూ.. గత ప్రభుత్వంలో ఉపాధ్యాయుల మొర ఆలకించే పరిస్థితి లేని సందర్భంలో తాను ధైర్యంగా ఉపాధ్యాయ ఉద్యోగ వ్యతిరేక చర్యలను ప్రశ్నిస్తూ నిలబడ్డానని తెలిపారు. అంతేకాకుండా తనకు లభించిన అవకాశాన్ని వినియోగించుకొని ప్రభుత్వ ఉద్యోగులకు సంబంధించిన పలు సమస్యలను కాంగ్రెస్ మేనిఫెస్టోలో చేర్పించామని పేర్కొన్నారు.317 జీవో అసంబద్ధతను మొదటగా తానే ప్రశ్నించానని తెలిపారు. ఇప్పుడు గొప్పలు చెప్పుకుంటున్న కొన్ని ఉపాధ్యాయ సంఘాలు ఆ రోజున కేసీఆర్ ప్రభుత్వంతో కుమ్మక్కై నిమ్మకు నీరెత్తినట్లుగా వ్యవహరించడంతో అనేక సమస్యలు తలెత్తాయని పేర్కొన్నారు. తాను టీపీసీసీ అధికార ప్రతినిధి హోదాలో సీఎం ముఖ్యమంత్రి రేవంత్ రెడ్డి గారికి విజ్ఞప్తి చేయగా 317జీఓ పరిష్కార నిమిత్తమై మంత్రివర్గ ఉప సంఘాన్ని వేసి కొన్ని జీవోలు విడుదల చేశారని, అయితే పాక్షిక పరిష్కారం మాత్రమే లభించిందని, తాను ప్రభుత్వంపై మరింత ఒత్తిడి పెంచి సంపూర్ణ పరిష్కారం దిశగా చర్యలు చేపట్టగలనని హామీ ఇచ్చారు. ఓల్డ్ పెన్షన్ స్కీం సాధన కోసమే నిరసనగా క్రికెట్ పోటీలు నిర్వహిస్తున్నామ ని కొందరు ఉపాధ్యాయులు ఆయన దృష్టికి తీసుకురాగా..రాష్ట్ర విభజన అనంతరం నూతన ప్రభుత్వానికి లభించిన అవకాశాన్ని కేసీఆర్ అహంకారపూరిత ధోరణి కారణంగా ఉద్యోగులకు ఓ పి ఎస్ స్కీం అమలు అవకాశం చేజేతులారా పోగొట్టుకుందని తెలిపారు. అంతేకాకుండా నాడు కిమ్మనకుండా వ్యవహరించిన కొన్ని ఉపాధ్యాయ సంఘాలు నేడు ఊసరవెల్లిలా రంగులు మార్చి కల్లబొల్లి కబుర్లతో ఉద్యోగులను మభ్య పెడుతున్నాయని పేర్కొన్నారు. అయితే తాను మాత్రం చిత్తశుద్ధితో ప్రయత్నిస్తూ కాంగ్రెస్ మేనిఫెస్టోలో ఓపీఎస్ సమస్యను చేర్చడమే కాకుండా విభిన్న పరిష్కారాలతో సీఎం రేవంత్ రెడ్డి తో చర్చిస్తున్నామ ని త్వరలో దీనికి అంతిమ పరిష్కారం కనుగొంటామని ఆయన ఆశాభావం వ్యక్తం చేశారు. అంతేకాకుండా గతంలో ఉపాధ్యాయులు జూనియర్ లెక్చరర్ గా , డైట్ లెక్చరర్ గా మరియు ఇతర ఉన్నత ఉద్యోగులుగా ప్రమోషన్లు పొందే అవకాశం ఉండేదని దానిని పునరుద్ధరించే ప్రయత్నం జరుగుతుందని, తప్పక సాధించి తీరుతామని హామీ ఇచ్చారు.
గత ప్రభుత్వంలో తొత్తులుగా వ్యవహరించిన కొన్ని ఉపాధ్యాయ సంఘాలు నేడు ఊసరవెల్లిలా రంగులు మార్చుకొని కల్లబొల్లి కబుర్లతో ఉపాధ్యాయులను మభ్య పెట్టే ప్రయత్నిస్తున్నారని వారి ఆటలు సాగనివ్వబోమని హెచ్చరించారు. తాను టీపీసీసీ అధికార ప్రతినిధి అయినప్పటికీ ఉపాధ్యాయ సమస్యల పరిష్కారం కోసం ప్రభుత్వంతో నిష్కర్షగా పోరాడుతున్నానని పేర్కొన్నారు.ఉపాధ్యాయుల న్యాయమైన సమస్యల పరిష్కారం కోసం తాను నిరంతరం శ్రమిస్తున్నానని, ఈ విషయాన్ని గమనించి ఉపాధ్యాయ లోకం తనకు అండగా నిలబడాలని కోరారు.
Leave a Reply