కేయూ హాస్టల్ ఖజానాకు గండి?

కేయూ హాస్టల్ ఖజానాకు గండి?

రూ.80 వేలకుపైగా ప్రయాణ భత్యం డ్రా చేశారన్న ఆరోపణలు….
ఉత్తర్వులు ఆగస్టు 21న జారీ అయితే.. ఫిబ్రవరి నుంచే చెల్లింపులు ఎలా?…..
హాస్టల్ తనిఖీల పేరుతో పేద విద్యార్థుల సొమ్ముకు గండి కొడుతున్నారంటూ విద్యార్థి సంఘాల ఆగ్రహం….

23 అక్టోబర్ 2026, జోర్దార్ కేయూ ప్రతినిథి:

కాకతీయ విశ్వవిద్యాలయంలో హాస్టళ్ల నిర్వహణ, ఆర్థిక వ్యవహారాలపై మరో వివాదం తెరపైకి వచ్చింది. యూనివర్సిటీ మహిళా హాస్టల్స్ డైరెక్టర్‌కు నెలకు రూ.6,000 చొప్పున ప్రయాణ/రవాణా భత్యం మంజూరు చేస్తూ రిజిస్ట్రార్ కార్యాలయం 21 ఆగస్టు 2026న ఉత్తర్వులు జారీ చేసిన నేపథ్యంలో, ఆ ఉత్తర్వులకు ముందే హాస్టల్ డైరెక్టర్లకు ఇదే మొత్తాన్ని చెల్లించారన్న ఆరోపణలు తీవ్ర చర్చకు దారితీశాయి. ఉత్తర్వుల్లో పేర్కొన్న తేదీకి ముందుగా చెల్లింపులు జరిగితే వాటికి ఏ నిబంధన, ఏ అధికారిక అనుమతి ప్రాతిపదికగా ఉందో యూనివర్సిటీ అధికారులు స్పష్టం చేయాలని విద్యార్థి సంఘాలు డిమాండ్ చేస్తున్నాయి.

ఆగస్టు 21న ఉత్తర్వులు.. ఫిబ్రవరి నుంచే చెల్లింపులా?..

కాకతీయ విశ్వవిద్యాలయం రిజిస్ట్రార్ కార్యాలయం 21-08-2026 తేదీన జారీ చేసిన ఉత్తర్వుల్లో, యూనివర్సిటీ మహిళా హాస్టల్స్ డైరెక్టర్ డా. కె. సుమలతకు, యునివర్సిటీ బాయ్స్ హాస్టల్ డైరెక్టర్ డా పోడేటి శ్రీనివాస్ లకు హాస్టళ్లను తనిఖీ చేయడం, అధికారిక విధుల నిమిత్తం ప్రయాణించడం మరియు రవాణా ఖర్చులను భరించడం కోసం నెలకు రూ.6,000/- వాహన/ప్రయాణ భత్యం మంజూరు చేసినట్లు స్పష్టంగా పేర్కొంది. అంతేకాకుండా, ఈ చెల్లింపులు యూనివర్సిటీ హాస్టల్స్‌కు అందుబాటులో ఉన్న నిధుల నుంచి చేయాలని ఉత్తర్వుల్లో పేర్కొన్నారు. అయితే, ఈ ఉత్తర్వులు ఆగస్టు 21న జారీ కాగా, ఫిబ్రవరి 2026 నుంచే హాస్టల్ డైరెక్టర్లకు నెలకు రూ.6,000 చొప్పున చెల్లింపులు జరిగినట్లు హాస్టల్ ఆర్థిక లావాదేవీలపై విద్యార్థి సంఘాలు ఆరోపిస్తున్నాయి. డా. శ్రీనివాస్, డా. సుమలతలకు ఈ విధంగా మొత్తాలు చెల్లించడంతో కలిపి సుమారు రూ.80 వేల మేరకు నిధులు డ్రా/బదిలీ అయినట్లు వారు పేర్కొంటున్నారు.

ఇక్కడే అసలు ప్రశ్న తలెత్తుతోంది—ఆగస్టు 21న ఉత్తర్వులు జారీ చేసినట్లయితే, ఆ ఉత్తర్వులలోని భత్యాన్ని ఫిబ్రవరి నుంచే ఎలా చెల్లించారు? ఉత్తర్వులకు పూర్వ తేదీ నుంచి వర్తింపజేసే ప్రత్యేక అనుమతి ఏదైనా ఉందా? ఉంటే ఆ అనుమతి ఎక్కడ ఉంది? ఆర్థిక శాఖ, ఆడిట్ విభాగం దానిని ఏ ప్రాతిపదికన ఆమోదించింది? అనే ప్రశ్నలకు యూనివర్సిటీ అధికారులు సమాధానం చెప్పాల్సిన అవసరం ఉందని విద్యార్థి సంఘాలు అంటున్నాయి.

ఉత్తర్వుల్లో లేని తేదీ నుంచి చెల్లింపులు ఎలా?…

21-08-2026 ఉత్తర్వులో నెలకు రూ.6,000 భత్యం మంజూరు చేసినట్లు ఉన్నప్పటికీ, ఫిబ్రవరి 2026 నుంచి ఈ మొత్తాన్ని చెల్లించేందుకు ఆ ఉత్తర్వులో ఎలాంటి స్పష్టమైన ఆదేశం కనిపించదని విద్యార్థి సంఘాలు పేర్కొంటున్నాయి. అయితే ఉత్తర్వులకు ముందు తేదీ నుంచి చెల్లింపులు జరిగి ఉంటే, అది సాధారణ చెల్లింపా? లేక ముందస్తు అనుమతితో చేసిన చెల్లింపా? లేక ఉత్తర్వులను వెనుకటి తేదీ నుంచి అమలు చేసినట్లా? అనే అంశాలపై సమగ్ర ఆర్థిక ఆడిట్ నిర్వహించాలని వారు కోరుతున్నారు.

ధృతరాష్ట్ర పాత్రలో ఆడిటింగ్ అధికారులు?…

హాస్టల్ కార్యాలయంలో ఏదైనా బిల్లు చెల్లించాలంటే సాధారణంగా సంబంధిత బిల్లును యూనివర్సిటీ ఆడిట్/అకౌంట్స్ విభాగం పరిశీలించి, నిబంధనలకు అనుగుణంగా ఉంటేనే పాస్ చేయాల్సి ఉంటుందని విద్యార్థి సంఘాలు గుర్తుచేస్తున్నాయి. అలాంటి వ్యవస్థ ఉన్నప్పుడు, ఉత్తర్వుల తేదీ, చెల్లింపుల తేదీ, బిల్లుల తేదీ, ఆమోద తేదీల మధ్య ఉన్న వ్యత్యాసాన్ని ఆడిట్ అధికారులు పరిశీలించలేదా? అని వారు ప్రశ్నిస్తున్నారు. ఉత్తర్వులు ఆగస్టు 21న జారీ కాగా, అంతకుముందు నెలలకు సంబంధించిన భత్య బిల్లులు పాస్ చేసి ఉంటే, వాటిని ఎవరు ఆమోదించారు? ఏ నిబంధన ఆధారంగా ఆమోదించారు? సంబంధిత అధికారుల నుంచి ముందస్తు అనుమతి తీసుకున్నారా? అనే అంశాలను ప్రజలకు వెల్లడించాలని విద్యార్థి సంఘాలు డిమాండ్ చేస్తున్నాయి. “నిబంధనలకు విరుద్ధంగా చెల్లింపు జరిగితే దానిని ఆపాల్సిన బాధ్యత ఆడిట్ అధికారులదే. కానీ చెల్లింపులు జరిగి ఉంటే, ఆడిట్ వ్యవస్థ ఏమి పరిశీలించింది?” అని వారు నిలదీస్తున్నారు. గతంలో కూడా టెండరు అనుమతులు లేకున్నా కూడా, వీసీ, రిజిస్త్రార్ల ఉత్తర్వులు లేకుండానే ఆడిట్ అధికారులు బిల్లులు పాస్ చేసినట్లు విద్యార్థి సంఘాలు ఆరోపిస్తున్నాయి.

హాస్టల్ తనిఖీల పేరుతో విద్యార్థుల సొమ్మా?…

కాకతీయ విశ్వవిద్యాలయంలో హాస్టల్ డైరెక్టర్లకు గతంలో గౌరవ వేతనం రూపంలో నెలకు సుమారు రూ.1,000 చెల్లించే విధానం కొనసాగిందని విద్యార్థి సంఘాలు చెబుతున్నాయి. అయితే ప్రస్తుత పరిపాలనలో హాస్టల్ డైరెక్టర్లకు నెలకు రూ.6,000 ప్రయాణ/వాహన భత్యం మంజూరు చేయడం చర్చనీయాంశంగా మారిందని పేర్కొంటున్నాయి. హాస్టళ్లలో తాగునీరు, పారిశుధ్యం, భోజనం, మెస్ నాణ్యత, మరమ్మతులు, విద్యార్థుల భద్రత తదితర సమస్యలు పరిష్కారం కాకుండా కొనసాగుతున్న సమయంలో, హాస్టల్ తనిఖీల పేరుతో అదనపు భత్యాలు చెల్లించడం ఎంతవరకు సమంజసం? అని విద్యార్థి సంఘాలు ప్రశ్నిస్తున్నాయి. హాస్టల్ డైరెక్టర్లు విధిగా హాస్టళ్లను సందర్శించి, సమస్యలను పరిష్కరించి, తనిఖీ నివేదికలను సమర్పిస్తున్నట్లయితే ఆ నివేదికలు, పర్యటన వివరాలు, సందర్శన తేదీలు, ప్రయాణ వివరాలు కూడా విద్యార్థులకు అందుబాటులో ఉంచాలని వారు కోరుతున్నారు. హాస్టళ్లకు వెళ్లిన తేదీలు, సందర్శించిన హాస్టళ్ల వివరాలు, తనిఖీ నివేదికలు, ప్రయాణ వివరాలు లేకుండానే రవాణా భత్యం చెల్లించి ఉంటే వెంటనే చర్యలు తీసుకోవాలని విద్యార్థి సంఘాలు పేర్కొంటున్నాయి. యూనివర్సిటీ హాస్టళ్లలో చదువుతున్న విద్యార్థుల్లో చాలామంది ఆర్థికంగా వెనుకబడిన కుటుంబాలకు చెందినవారే. విద్యార్థులు చెల్లించే హాస్టల్ ఫీజులు, మెస్ చార్జీలు, ఇతర వసూళ్లతో నడిచే హాస్టల్ నిధులను అత్యంత జాగ్రత్తగా వినియోగించాల్సిన బాధ్యత అధికారులపై ఉంది. అలాంటి నిధుల నుంచి అధికారులకు భత్యాలు చెల్లించేటప్పుడు నిబంధనలు, తేదీలు, అనుమతులు, విధి నిర్వహణకు సంబంధించిన ఆధారాలు స్పష్టంగా ఉండాల్సిందే అని విద్యార్థి సంఘాలు అంటున్నాయి.

సమగ్ర విచారణకు విద్యార్థి సంఘాల డిమాండ్….

విద్యార్థుల నుంచి వసూలయ్యే ప్రతి రూపాయి హాస్టల్ విద్యార్థుల సంక్షేమానికే వినియోగించాల్సి ఉంటుందని విద్యార్థి సంఘాలు స్పష్టం చేశాయి. “ఉత్తర్వుల తేదీకి ముందే భత్యాలు చెల్లించి ఉంటే, అది కేవలం లెక్కల సమస్య కాదు; యూనివర్సిటీ ఆర్థిక పరిపాలనలో తీవ్ర పారదర్శకత లోపానికి సంకేతం. ఉత్తర్వులు ఎప్పుడు జారీ అయ్యాయి? డబ్బులు ఎప్పుడు చెల్లించారు? ఎవరు ఆమోదించారు? అనే మూడు ప్రశ్నలకు అధికారులు బహిరంగంగా సమాధానం చెప్పాలి” అని వారు డిమాండ్ చేస్తున్నారు. ఈ వ్యవహారంపై వైస్-ఛాన్సలర్, రిజిస్ట్రార్, ఫైనాన్స్ అధికారి, ఆడిట్ విభాగం సమగ్ర వివరణ ఇవ్వాలని, అవసరమైతే బాహ్య ఆడిట్ నిర్వహించి వాస్తవాలను బయటపెట్టాలని విద్యార్థి సంఘాలు కోరుతున్నాయి. నిబంధనలకు విరుద్ధంగా ఒక్క రూపాయి కూడా చెల్లించలేదని అధికారులు భావిస్తే, సంబంధిత బిల్లులు, ఆమోద ఉత్తర్వులు, చెల్లింపు వివరాలు, తనిఖీ నివేదికలను బహిర్గతం చేసి అనుమానాలకు తెరదించాలని విద్యార్థి సంఘాలు సవాల్ చేస్తున్నాయి. కేయూ హాస్టల్ ఖజానా విద్యార్థుల సొమ్ముతో నడుస్తోంది. దానికి ఎవరు జవాబుదారులు? ఉత్తర్వులు ఆగస్టులో వస్తే ఫిబ్రవరి నుంచే భత్యం ఎలా? — ఇదే ఇప్పుడు కాకతీయ విశ్వవిద్యాలయంలో ప్రధాన ప్రశ్నగా మారింది.